2011年七一遊行日記, kameyou

2011年七一遊行日記, kameyou

本帖最後由 kameyou 於 8-7-2011 01:02 編輯

七一都過左5日,發生好多事,今日先寫回憶~

從2003年起,年年都去七一遊行。呢三年都做香港人網的義工,09年在維園,10年同今年都係灣仔修頓。咁多年經驗,其實維園出發係最辛苦,因為一定塞人塞好耐,無得行,企定定乾曬;但亦係最開心,因為睇得最多野、最多人、最多團體、最多攤位。至於灣仔修頓,就已經係半路中途,無咁逼人亦行少好多路,舒服,但卻睇少左好多情形,睇唔到毓民在鵝頸橋發威,又睇唔到公民黨余大狀的風彩。

早就報名七一1點鐘後做義工,人網職員Norris安排我到灣仔修頓報到。12點從家中出發,背囊,充滿的電磁與後備電磁, 後備SD card, 數碼相機, 一大樽水,帶支Vuvuzula。一點到灣仔,遠遠望見修頓旁邊家計會前的空地已經在佈陣了。




已經有廿幾個義工在工作了,看 T-shirt,主要是香港人網與選民力量的義工,少數人民力量義工。義工多數未見過, 約略認得一個, 好似係 batmanCC. 看見星屑醫生、歷蘇,還有人網的財政大臣Queenie。當我地工作之時,有兩個PTU巡過,就問我地邊個係負責人。歷蘇就係場地申請人,同警察吹左一陣,無事,繼續。

set 好counter, 歷蘇坐在人網街站直播高台之後、家計會前休息. 撩歷蘇吹水. 記得林公子在節目話過歷蘇已經不追求金錢、只追求理想. 我問歷蘇家陣係追求舞台劇、網上電台、定係政治?

歷蘇話, 自己其實無心政治, 不熱衷政治. 只係因為幫網台, 幫林雨陽. 但歷蘇自己都有政治見解. 佢覺得林瑞麟做人應該老實. 如果你老老實實講係共產黨壓落蒞, 被逼要做, 咁我都唔會咁不滿. 如果你恃共產黨惡就去凶香港人, 咁都老實, 我服你.

家陣係共產黨畀垃圾你去sell, 你打份工, 要sell客, 要sell畀香港人, 你係咪應該好聲好氣去sell? 係咪要有個好的服務態度去sell畀香港人? 但你林瑞麟就講大話, 唔講道理, 大律師公會講咁多咁多次你都當係黐線. 實在太離譜.










Queenie同眾人網義工講解一下,大家拎住「意見收集箱」,派發遮、李家誠吹氣大槌、卿姐民主女神棍等,同時向遊行群眾收集「意見」,群眾都好躍約用錢去表達意見。當然,兩點時無乜人,我地義工都自己入定「意見」落箱,廢時空框框唔好睇。我就選了一條黃色的人民力量頭巾畀閃光,又買左選民力量的發光power voter風扇仔。

同人民力量的義工聊天,問佢地係前線、泛藍、壹零憲章還是普羅政治學院?佢地話其實只係人網義工,不過分少少力量幫人民力量。無錯,其實灣仔修頓站所見,人網義工係自己來來往往幫哂三邊,好free下~~ 我自己都身穿香港人網衫,同時掛方形選民力量襟章,幫兩邊~~




兩點半左右,警方人多左,開始封一條行車線,因為雷曼苦主的遊行隊伍快到了。這時前方有一個赤膊阿伯同幾個警察一齊。我上前影影,原來阿伯在裝飾自己個遊行小車仔,警察仲幾好口,叫阿伯小心。雷曼苦主大隊離去後,警方開始全線封路。人網義工即使佈置旗海,更拉線將大喇叭安放到左右行車線中間的鐵欄杆。










蕭真人在維園做節目,我地無得聽。悶,悶到近4點,突然間喇叭有聲,原來係黃洋達開咪、小米、阿偉。即時大家醒神哂~ 有節目做,修頓附近聚的人越來越多,但龍頭遲遲未到。不久,林超榮又來講幾句。蕭真人、阿靳到來了修頓。黃洋達就企上高台演講。黃洋達上哂身,氣勢有如1年前長毛在修頓叫曾蔭權仆街。

咁多明星,修頓即時企滿哂人。我地的意見箱當然都開始入滿大量意見啦~~
講左大半個鐘,于飛都上左高檯,主力要推翻投共的偽國民教育,係獲得頗多掌聲。
終於,
龍頭到步,遠遠見到係民間人權陣線的車與大旗,李偉儀在其中。

http://www.youtube.com/watch?v=reHNakvPua4
                                       









選民力量靚靚義工組長 Ellen







知唔知咩叫人山人海?
知唔知修頓站幾逼人?條龍行得幾慢?呢鑊並非警察截龍,而係太多市民圍在人網台前聽演講~~
黃洋達:「林瑞麟!」民眾:「下台!」
黃洋達:「林公公!」民眾:「食屎!」
黃洋達:「我地從三點叫到依家,民眾都大表讚成,並無反對,依林瑞麟講法,我地咨詢成法咁高,可以證明,全香港人都讚成,林瑞麟係應該去食屎架!」
群眾笑到死死下~~
小米:「咁下台好定食屎好呀?」
黃洋達:「下台,係林瑞麟要負擔的責任!食屎,係佢個人的興趣!」


咁多年七一,今年算係天氣幾好,天陰陰時間算多,仲間中有風,最舒服今年。我地義工努力「收集意見」、派遮、派風扇,選民力量義工更大派口號貼紙,主動幫人貼在衫袖。Queenie拎左一袋黃遮畀我負責。右手撐著打開的黃遮,左手拿著兩把未開的遮。遮就唔多人要,風扇仔多d。不過,唔少人純捐錢唔係要任何野,一見到,我就送遮畀對方,大叫多謝。我漸漸前移到選民力量的檔攤,因為那邊沒有人網黃遮。「意見」照入選民力量錢箱,人網遮照派。同氣連枝,無乜所謂。人叢中畀我認到 Cuson,當然捉佢前來同我合照~ 佢捐「意見」我送遮。一陣,Cuson 被人網高台的主持發現,捉左佢去喊口號~~

我做義工做得求其,自己掛住拍video同影相,甚至拿Vuvuzula和應一份,自娛多過一切。做義工好玩架,建議大家下年都參加~~ 當我自己掛住玩時,選民力量的義工好勤力,補充貼紙。我就懶懶閒,繼續遊來遊去。






一直都有各個不同團體經過。藝術公民經過時,有扮警察的,有各色奇怪樂器的,抗議警察禁止民眾帶樂器,即時黃洋達在高台號召一齊發聲,我就拿出 Vuvuzula 亂吹~~ 一陣高登 V煞經過,又同黃洋達互相呼應。

原來,人民力量大隊離開維園時,因為人太多,被警方截了龍,斷成六、七條小隊。青天白日旗搖動,原來是親國民黨的神州青年服務社隊伍,高台號召他們留在修頓,等齊人民力量的大隊,齊人後再一同出發。

五點半左右,高台大叫「人民力量」大隊第一隊到了。黃黑旗海,人多勢眾,人網現場更加逼了!

老友 Aaron 找到我,佢話修頓太多人,搵我搵足十分鐘。其實,人太多,又熱鬧,我都聽唔到兩三個電話。Aaron 醒左我支凍咖啡 starbuck~ 貴野,我平時都唔捨得買。Aaron 都帶左支 Vuvuzula 蒞,話本來執屋想丟,點知不知所謂差佬話唔准遊行帶樂器,即時決定帶支 Vuvuzula 蒞遊行。Aaron 一邊觀看,一邊用手機聽網台直播,留左一陣,決定返中環的公司叉電,晚上再聯絡。

這時,我有點累了。人老喇,太易攰。就坐在人網台後的空地,休息。有個阿叔醒我一枝冰水,佢話陳偉業在節目叫大家一人帶十枝水,可以請其他人飲。真係偉大。之後,我坐同休息,不再收「意見」,也沒有觀看現況了,只是聽著。

等了頗長時間,人民力量大隊仍然未齊集,道路也變得越來越逼人,人龍流動更慢。人民力量大旗終於到了,是陳偉業與甄燊港。陳偉業上高台喊口號。後來,因為太慢,人也太多,決定派先頭部隊先去政府總部及禮賓府。

我休息。後來聽到廣播說「紫荊女俠」到了!我即時彈起拍攝。紫荊女俠到,選民力量也到了,慢必、星屑醫生、林公子等都來到修頓了。










人多到咩地步?



愛明教主與紫荊女俠開咪, 話要多謝人網義工十八銅人, 推著戰車行咁遠, 係好累.
慢必在高台接力, 講起上年在修頓高台唱衰民主黨. 同大家一齊複習返上年的口號, 練下《卿姑七友》.

練完一次之後, 高台的主持大叫:「遠遠見到民主黨的旗幟喇~」台下群眾即時大喝倒彩. 大家再唱《卿姑七友》唱得好大聲. 但我望來望去, 只見到公民黨的旗幟而矣~~ 大家鬧鬧下, 慢必話:「咪住, 迎面而來係公民黨的人呀, 咪鬧錯人呀!」大家全場笑. 慢必大叫:「我地同公民黨的朋友打招呼。公民黨朋友大家好~~」台下群眾即時揮手、拍手、喝彩。公民黨人亦離遠搖動旗幟呼應~~

不過, 修頓香港人網聚左太多人, 好逼, 所以人龍前行得好慢好慢。公民黨的隊伍行極都未到。這時我終於看到公民黨旗後就係賤鴿黨的旗.

慢必話風一轉:「求先我響維園見到陳淑莊, 問陳淑莊會唔會參加拉布. 佢話唔會 ...」台下即時喝倒彩。慢必繼續:「不過, 不過~ 陳淑莊話, 公民黨會參與發言, 會爭取機會解釋憲制立場, 釋述重要觀點, 釐清問題!咁即係, 公民黨口話不會拉布, 其實就實際參與啦~」群眾有人叫好。

黃洋達即時開口:「好呀!我中意呀!我中意呢d捉字蝨的大律師!!!」台下群眾死笑~~

公民黨終於來到,擦身而過。大家從歡迎,漸漸變成「拉布」「拉布」號召公民黨。其後,即時轉為倒睬聲,因為賤鴿民主黨的人到了~~ 無謂寫了,自己看~~

http://www.youtube.com/watch?v=ieOTeHjQo-c
                                       

驚頭痛,不斷飲水,不斷去廁所。好在修頓有廁所~~ 在廁所突然畀人叫停,原來係林公子。林公子問:「你老婆呢?咦?係喎,你要丟低你老婆喎~~」真係感謝林公子問候。林公子個樣好 hyper 好精神。但我個樣就好唔掂下~ 去完廁所,即時打電話畀閃光報到。閃光問我幾時返,我話唔知毓民佢地會點做,打算留耐d。

其實,之前已經講左七一晚不會回家食飯,因為一早打算玩夜d。不過,當時心中只係諗住玩到十點左右,只係打算支援或旁觀,多過真正參與。

這時警察開始插人要拉橙帶,我拍video影實,甚至偷偷地鎖匙在手,咭穿橙帶扯斷佢。點知轉頭個警察發現條帶就快斷,即時扯斷佢再打結綁返。激死。原來,修頓即係逼人逼得太緊要,遊行人龍已經幾近停頓。警察拉橙線遇留半條行車線讓人龍繼續前行。

人叢中有人叫住我,係一個都算熟的社民連人。佢問我點解人完全唔郁,點解行唔到,佢問最前邊係咪畀警察截停,定係人民力量截停人龍。現在回看,似乎有人不了解,就流傳謠言。對方聽到謠言,半信半疑,就上前來查看詢問。其實前邊發生乜事,我都唔多知,因為人逼得太緊要,唔係咁容易可以行到去修頓球場那邊睇到。

精彩過後,我越感疲累。老喇,唉~ 七老八十~~~ 再次坐回台後休息。已經看到好多好多人坐在地上。我都成為一份子,坐在報紙上,倚在牆邊。聽到高台說毓民已到,呼歡聲四起。毓民當然都演講啦。但我太累,無乜心機影相、錄影。

我諗我個樣真係好榭,有位坐在前邊的白衣人送我一張退熱貼。我的確有點頭痛、頭赤赤。貼在額上,拿拿地,冰冰涼,慢慢都舒服左。不久,發覺有點肚餓。睇錶已經八點,決定自己食野先。修頓旁的老麥太多太多人,就行去後邊街搵野食,結果行左去莊士敦道 KFC,唔多駛排隊,有位坐。個侍應妹妹見我衣著,問我係咪遊行完。我答未,食完要再參與遊行。跟住,KFC 妹妹問左個好天真好傻的問題。我諗多數人會好火。但我就明白呢個世界一樣米養百樣人,真係好多人好無知,正如我細妹一樣。

KFC妹:「聽人講呢,遊行有 $500 蚊收喎,係咪真架?」
本少俠:「無架,點會有呀?有就唔駛 KFC 啦。其實係民建聯的人派開錢、收開錢,就小人之心,以為支持民主、參與遊行的都係有錢收。民主派咁鬼窮,鬼有錢咩~」
KFC妹:「咁你係邊派架?」
本少俠:「毓民囉~」我諗我當時其實要花多d心機去宣傳人民力量,錯失左添~
KFC妹:「乜毓民唔係退出左咩?」
本少俠:「毓民退出左之前個黨,但另起新組織嘛~~」


食飽,回修頓前,行上天橋觀看、影相。天橋係分界線,前邊係香港人網及人民力量,後邊係社民連。社民連人不太多,同公民黨差不多。人民力量多人到畀警察人鏈截了尾之後,仍然有一堆人民力量支持者靜坐其後。







講台不斷呼籲大家必須食晚餐、飲水、休息,要補充體力,今晚玩鋪勁。同時呼籲老弱婦孺回家休息。又話,大舊、甄燊港、馬草泥佢地先頭部隊去完政府總部後去到禮賓府前,被警方叢叢包圍,玩在要等待,要求警方讓修頓的人民力量大隊出發去禮賓府!

我諗我真係好榭,那位白夜長髮青年再畀多一張貼熱貼我,我話唔駛。其他人就話我個樣好唔掂,問係咪唔舒服,勸我唔好堅持。九點後,我老友 Aaron 再來到修頓,打算一齊出發。佢一邊觀看,一邊聽耳機,一邊上網睇高登轉播各地最新狀況。

黃洋達說高登 V煞隊伍已經去完政府總部, 決定回來灣仔修頓合流, 共同出發~~! 現實群眾呼聲震天~~!

接近十點,大舊他們先頭部隊回到修頓,會合,出發!終於起步!
一起行,士氣大振!好開心~~ 
原來在修頓靜坐休息真係好重要,我個人精神左好多,唔似之前三、四個鐘咁榭。
自己睇片啦~
http://www.youtube.com/watch?v=jMSLyUD2CGw
                                       

起步前,毓民、大舊、馬草泥一直在高台叫大家跟緊d,唔好慢,唔好落後,因為好容易會畀警察乘機截龍。我地隊伍行下停下,前方時而叫坐低,時而叫大家放低旗幟,時而再起行,可能係警察玩野。

我其實輪近隊尾。行近金鐘前,隊伍後間中有人叫「警察截龍呀」令到後部隊伍的人遲疑不前。但後來望回去,唔覺有咩截唔截龍。似乎真係警察臥底搞事、要拖慢隊伍。

隊前傳來消息,說不去禮賓府,轉去長江中心。老友話在網上看到說社民連人在長江中心。我諗,係咪警察封哂,無地方去,只能去長江中心?去支援社民連?我諗,咁驚唔驚從「撤回補選」轉移視線做「打倒地產霸權」?

人叢中,撞到人網版主 Fibo,又撞到鐵膽義工 Shoku。我仲遇到一個學生,同一個姐姐一齊行,佢話係佢教會的導師~ 教會導師,請幫拖剷梁美芬~~

我地遊行隊伍最開心係封路停頓電車上的人向我們招手支持。人地被截停、被困、被阻住發達,都支持我地,真係好開心。天橋的人、對面行車線的人、對面馬路巴士上的人都有向我們招手,我地回禮,甚至呼籲佢地加入~~ XD  當然,唔會有啦~ XD

去到金鐘橋前,已經十一點。氣氛開始有點緊張。我自己而言,已經係超過自己遇計的時間。唔好話第二日晏晝要返工,又怕阿爸阿媽話,又怕閃光在家擔心。打下電話畀閃光報平安。其實,呢刻我已經打算行到地鐵站附近就走。

到紅棉道附近,大隊靜坐。開始有人離開馬路,閃到行人路旁邊。我在隊尾。我與老友討論,我覺得毓民都係太負責任,唔會務險,唔敢撞警察,我好擔心事後又畀班社運人狂鬧。老友就唔係咁睇,佢覺得毓民可能會學Q仔話齋,徹夜留守到聽朝,如果拖到聽朝,就會再有人群支援云云。

林公子行到隊尾同大家講話。毓民佢地都推廣播車仔到隊後講。原來警察人鏈封路,人民力量決定號召年輕年壯的男生走上前排,決定要衝開警察人鏈,叫大家有心理準備,叫大家要緊跟前隊,當衝開人鏈後要快步緊跟前隊衝出去。說畢,毓民他們走回前方,林公子仍留在隊尾。不久,所以人企起身,大隊急步前行,遠看到人群急步跑到天橋底旁邊,有人負責收起旗幟。

收旗?我即時諗,輕裝減重,真係要撞喎,蒞真喎!正係不斷前衝之際,龍尾又有人叫截龍。猶豫之際,前方好像又停了。我地在龍尾部份的根本不知道前方發生乜事,失去聯絡。看到越來越多人在天橋底巴士坐散到路旁,有人坐著,又有中午叔叔說:「無法,唯有下年再蒞。」我同老友諗左一陣,都係撤退。

11點半,本少俠做左逃兵。
逃兵一號報到~~

從旋轉樓梯行上天橋,大約時11:45pm,突然隊頭不斷呼叫隊尾的星屑醫生上前,當時不知何事。後來才知道,已經發生了衝撞,有人扭傷、流血。行過對面馬路的大廈平台,遠遠看到龍頭方向,聽到馬草泥用大聲公批評警察毫無警告、無故向和平示威者用楜椒噴霧,號召大家靜坐抗議。我當時唔知原來龍頭曾經同警方推撞過。

最吹漲, 係馬草泥佢地在龍頭喊咪, 原來對面天台天橋係好應聲, 聽得好清楚, 反而我身在龍尾就咩都聽唔到!
溝通、訊識交換仍然係最大問題~~

去遮打花園公廁,忍左好耐下。尿急係遊行靜坐最嚴重問題。唔飲水會頭痛,飲太多內急難忍。又要趕去尖沙咀地尾班車返元朗。搞左一輪,返都屋企都一點過後。太夜,無法寫回憶,只能簡單 upload 最重要的三段 video。

閃光無嬲我玩咁夜。反而因為返到屋企仍上人網睇網友報到、掛住upload video,夜夜唔睏,激死閃光,終於都發嬲 >_<

事後諗起,做逃兵,都應該去地鐵站71買麵包蛋糕,離遠丟畀堅持的群眾,略盡棉力,等佢地補充體力。其實我又唔會內咎,自稱逃兵一號,都係自嘲多於一切,而且有參加過,都係另一種自豪,話哂「戰狼三千」嘛~~

唔駛內咎,因為我想蒞就蒞,想走就走,從來都係個人意志主導一切,認同毓民理念所以參與、支持。我參加,心安理得;我決定離開,都一樣心安理得,全部都係自己的個人意願、自由意志~~






















或者眾有細節脫漏, 之後慢慢補. 但大概就是如此了.
3

評分次數

I like it very much. Please update soon.
thanks for sharing!
waiting for update!
福由慈心聚,
壽由悲心積。
支持~~推~
期待UPDATE~
http://www.youtube.com/watch?v=reHNakvPua4
                                       

http://www.youtube.com/watch?v=LfxVrWjkILk
                                       

http://www.youtube.com/watch?v=pVxEyeiJ5mE
                                       

http://www.youtube.com/watch?v=ih1HX5JBKtI
                                       

http://www.youtube.com/watch?v=TWJthzUKFss
                                       

http://www.youtube.com/watch?v=o0DRZOGF6sk
                                       


慢必領唱《卿姑七友》
http://www.youtube.com/watch?v=Y4JtbkRyA-A
                                       

2011-07-01 七一遊行 修頓 唱爆政棍民主黨 video08 - 133
http://www.youtube.com/watch?v=ieOTeHjQo-c
                                       




http://www.youtube.com/watch?v=NaJyp99olio&
                                                                               

我的係從群眾角度影回去,蕭真人說話時,大眾歡呼聲震天。

最好笑係臨尾,黃洋達同星屑醫生妙語連珠。

星:「我見在場都係男性多,大家女朋友、老婆都在家中。快d叫佢地運水運糧支援。」
黃:「大家快d叫大家親戚朋友蒞支援。甚至有第二房都叫埋蒞~~」
星:「係呀,大義當前,你老婆都唔會介意架~~」
黃洋達死笑幾秒不能言,再說:「星屑醫生你叫呀笨!」
星:「你叫呀嘛,你係皇上,一定又皇后,又好多貴妃。」
黃死撐:「我老婆係蒞左呀!」
星:「叫皇后上埋高檯呀嘛~」
黃:「咪喇,唔係喇,擒高擒低 ...」
慢必搶答:「粗身大細!」


http://www.youtube.com/watch?v=RKdqsQhZ9Yk
                                       


晚上10點, 人民力量從修頓出發~~

http://www.youtube.com/watch?v=jMSLyUD2CGw
                                       


http://www.youtube.com/watch?v=GnDdGRWT7Ss
                                       

http://www.youtube.com/watch?v=mpOP1Qwe4w0
                                       

2011-07-01 七一遊行 人民力量 People Power video14 [11:00pm] - 181
http://www.youtube.com/watch?v=ILre-K4ziHo
                                       
謝謝你,嘉美尤!
生命誠可貴,
愛情價更高。
若為自由故,
兩者皆可拋。