《Temple Run 2》喪走兼玩礦車

《Temple Run 2》喪走兼玩礦車

靠喪跑起家嘅《Temple Run》啱啱出咗第二集,各方面都有升級,加入全新場景同障礙物,亦強化道具和新增角色,最抵讚係仍然免費任玩。《Temple Run 2》比第一集靚咗,雖然場景同角色嘅多邊形數目仍然唔係好夠,但色彩表現搭夠,而且場景變化大,喪走都冇咁悶。

遊戲玩法跟第一代相同,主角仍然係從神廟逃脫喪走,控制方法依然是向上跳躍、向下俯衝、向兩側轉彎以及傾斜收集金幣,操作變得更靈敏。本作難度都幾高,好似吊索、礦車等內容,都要花少少時間適應操作;在礦車版圖時,要向下避開橫樑,而傾斜轉彎時要留意軌道係咪掘頭路。另外,隨住收集寶石愈多,畫面左側的能量棒會加長,當能量棒儲滿,Double Click就可啟動特別技能。

平台:iOS 4.2 

下載費用:免費

《Fitocracy》男人的浪漫男人的浪漫又點止豆腐火腩飯,好多男人都鍾意去Gym操「肌」,呢個新App《Fitocracy》就幾啱用!程式可以Mon住各項訓練的成果,除了有一大堆文字同數字顯示外,仲可以解鎖各種唔同成就,等大家健身更有目標。不單如此,閣下嘅健身成效會同全世界其他用緊同一個App嘅用家比併,唔衰得的話一定要加倍努力!

平台:iOS 5/Android 2.2 

下載費用:免費

《Final Fantasy All the Bravest》角色大混戰又有《Final Fantasy》遊戲在iOS平台上推出喇!Square Enix炮製了一款以復古2D Bitmap角色擔正的RPG遊戲,並以大堆頭見稱,一次過帶一大隊角色大混戰。遊戲會沿用《FF》的ATB(Active Time Battle)戰鬥系統,每隔三小時就會出現新一輪Fever選項,發動後唔需要等ATB計儲滿都可攻擊。玩法同正統《FF》有少少唔同,不過登場的遊戲角色、敵人同音樂都源自《FF》系列,更有出英文版同日文版滿足唔同國界Fans!

平台:iOS 4.3 

下載費用:$28

《Joe Danger Touch》搞笑特技電單車《Joe Danger》嘅PSN和Xbox LIVE Arcade版本都大受歡迎,今次移植到iOS,自然多人期待。遊戲表現都無令Fans失望,畫面更拍得住主機平台版本。《Joe Danger Touch》係橫向特技遊戲,玩家係揸花式電單車的特技人,要挑戰各種高難度表演,一邊要跳過障礙,一邊收集金幣,然後再做出各種特技動作,玩法簡單又有趣。

本作當然係以觸控操控,方法亦十分簡單,按一下就起跳,長按就變成前輪向下俯衝,擅用這兩種技巧就可以跳過各種高難度障礙物同跳台。之後遊戲仲會加入其他新操控方法,亦可在每關上解鎖唔同角色。遊戲也不乏搞笑情節,輕鬆又好玩!

平台:iOS 5 

下載費用:$23

《Momentsia》拼貼相片好易篤其實如《Momentsia》這類能將幾幅數碼影像拼合成一幅相的App實在好多,不過這個新推出的,設計簡潔得來又Artistic,就幾啱筆者心水。只要一按下方中央的Icon,程式自動會幫大家改變圖框樣式,揀啱後只要在顏色方塊上篤一下就可加入相片,篤兩下就會開着鏡頭影相,簡單又易用。

平台:iOS 6 

下載費用:免費

《Swipe - Add Text or Captions to your Photos》加文字玩EffectApp名超長,但只要鍵入「Swipe」都搵得到。至於這個App的用法就是靠「Swipe」,在相片上「一掃」加入文字,等相片無咁齋,而且仲可以加埋水印添!字款更有成100款,用家可以自行縮放文字大小,轉換顏色或透明度,亦可旋轉以及對齊,鍾意在相片上加Effect嘅用家都值得花呢幾蚊雞囉!

平台:iOS 5 

下載費用:$8


Brian



《Temple Run 2》唔止又跳又跑,仲要玩埋吊索!
TommyKin