白蛇反擊戰HT 1/6 Storm Shadow

白蛇反擊戰HT 1/6 Storm Shadow

白蛇反擊戰HT 1/6 Storm Shadow


2012年世界沒有末日,但2013年一樣危機四伏,單計一套《義勇群英:毒蛇反擊戰》(GI.Joe 2:Retaliation),睇Trailer已經搞到倫敦大爆炸兼世界大亂,當中最為人熟悉嘅毒蛇黨大壞蛋,首推李秉憲飾演嘅Storm Shadow。雖然齣戲三月尾先上畫,不過Hot Toys已經行先一步,以超像真技術打造出呢位亦正亦邪嘅白忍者,女粉絲請準備尖叫!

《義勇群英:毒蛇危機》喺2009年票房大收,末段擺明會開續集;今次壞事做盡嘅毒蛇黨捲土重來,布局誣陷一眾義勇群英,被全球政府追捕。其實續集原本排咗去年暑假上畫,但為咗加強視覺效果同埋賺多一筆,於是改為3D版,所以拖到今年三月先上,如此變卦反而幫咗HT,可以一早攞到角色造型資料,Figure仲快過套戲見人,上個月有黑忍者Snake Eyes,今次就輪到死對頭Storm Shadow。

五官到位 眼神欠狠其實自從由Hasbro嘅3.75" Figure開始,Storm Shadow已經係熱搶Hot Item,除咗造型突出,亞洲人面孔都係主因之一。電影版由型男李秉憲飾演,注目度進一步提升,HT就隆重其事搵嚟Lee So Young落手雕頭,加埋J.C.Hong塗色監修,單係頭雕就用咗五個月開發。亞洲人面部輪廓較淺,頭雕難度自然比外國明星高,但試辦所見五官依然像真,軟膠頭髮亦具層次感,不過個人認為雙眼情深得滯,感覺似拍韓國偶像劇,如果兇狠番啲,就更切合角色性格。

有心機 蒙面Mix & Match真人Look爭啲,好彩仲有個蒙面Look畀玩家換。以前其他廠造呢款頭,頭套及面罩大多只係一塊膠啤製而成,今次由HT出手,自然冇咁簡單,先喺面上貼咗一塊格仔網紋布料,再喺四邊加番膠製頭套,Mix & Match之下令嘴巴若隱若現,達致跟戲服相同嘅效果。HT補充,憲哥睇過兩款頭雕都相當滿意,兩者都一剔Pass,毋須左改右改,令Figure趕及電影上畫前曝光。

金屬雙刀 質感贏晒上次Snake Eyes有套盔甲上身,令HT花咗唔少時間設計,相比起嚟,Storm Shadow件衫就簡單得多,上身係仿皮,手臂、腰間同小腿就有銀色彈性運動布點綴,另外背脊嘅雙刀刀鞘及燕子尾亦跟足戲服,配合由小丑改良而成嘅素體,擺甫士Chok到痹!武器方面,貴為嵐影忍部傳人,格鬥兇器自然唔少,隨盒有三支飛鏢、兩把匕首及兩把武士刀,後者嘅刀身仲係全金屬製成,質感比一般膠刀高幾倍啦!

同場加映

HT唯美新支線 PPS01:Mark XLII雖然1/6 Action Figure標榜可動性,但並非每個玩家都會經常攞嚟扭嚟扭去,反而好多人都會一個甫士玩到老。有見及此,HT最近推出全新系列「Power Pose Series(PPS)」,定位為半可動Figure,可動性不及主打嘅「Movie Masterpiece Series(MMS)」,但就縮短開發時間,並且提供更唯美、更肉緊嘅甫士效果,售價亦會比MMS稍低。頭炮作品就係《Iron Man 3》內嘅Mark XLII,跟MMS一樣,成個Figure有30cm高,沿用以往嘅仿金屬塗裝,雙眼、心口及雙掌亦內藏LED亮燈裝置,至於右前臂設計成完全拉直嘅甫士,令發炮動作做到更有力量感。另外,雖然係零關節設計,但右邊大腿及左手手腕都可以換件,換咗大腿後,就可擺出站立或凌空提腿甫士。

零售價︰$1,280

預售價︰$1,230

推出日期︰今年第二季

查詢︰2388 4677(Toy Hunters)


Gibert



*圖中為試辦款式,與正式推出的版本或有若干分別。

PPS 1/6 《Iron Man 3》 Mark XLII
預售價︰$995推出日期︰今年第二季

五官輪廓都似足李秉憲真人,不過眼神畧嫌柔情,依家係拍《義勇群英》,唔係谷眼淚嘅韓劇喎。

同戲服一樣,手臂位有銀色運動布點綴,又有長長嘅燕尾,不過後者嘅覆蓋面太大,或者會阻礙雙腿活動。



選用小丑Body,利用其寒背特徵作為背負雙刀嘅受力點。

Body有成30cm高,關節就有30個,可以輕易擺到多款甫士。

戲中憲哥着「Y字頭」波鞋,HT自然跟到足。

附件方面,隨盒就有三支飛鏢、兩把匕首、兩把武士刀及一把手槍,以及九款造型手掌連一個底座。



毋須遷就關節,手臂可以完全伸直,更有力量感。

拗腰造型更自然,唔再有關節穿崩嘅問題。

隨盒包括右邊大腿及兩隻左手腕,以便擺出唔同造型。

換腳就可變做站立甫士,配合圓形地台,有型程度唔會輸畀MMS。



TommyKin