不打‧短評32:3個特攻美少年(有內容)

不打‧短評32:3個特攻美少年(有內容)

不打評價:正場價$63

不打總評:三個靚仔冇得輸!

事先聲明呢套戲我個人評價$43,但有$20係老婆要求一定要俾
我睇既時候係中午場,冇咩OL反而好多暑期學生妹
由一開始金秀賢出場,之後朴基維到最後李玹雨陸續登場,真係全場女仔都尖叫
之後每個chok樣每個close-up成場女仔都起晒哄,我心諗「係好靚仔但駛唔駛」時
才發現我老婆都有份嗌埋一份!?
你問我,我本質上一定葡萄,但葡萄過後越睇越發覺三個真係靚仔到冇得輸
入場唔睇故仔,純為昅仔,$63真心抵俾!韓風席捲全球,係有佢地既真正實力!

【3個特攻美少年】來頭非同小可,橫掃韓國影壇連上年票房第一神作【盜賊門】都贏埋
套戲本身充滿商業計算,劇本改編自累計點擊超過4,000萬次的同名網絡連載人氣漫畫
再搵三個完全唔同類型但同樣非常靚仔有型既當紅嫩口男生擔正
仲要金秀賢同時演繹人體兵器北韓特工與及士多店傻仔兩個身份,極大既落差造就佢既完美發揮
再搵上年憑著話題作《金福南殺人事件始末》一炮而紅既新晉導演張哲秀開拍
再搵粒粒星撐場,性感有李彩英,清純有朴恩玭,再加人氣新人金成鈞同埋殿堂級老戲骨孫賢周
未上映,先興奮,破晒韓國有史以來預售記錄,話題作中既話題作,風頭一時無量

平心而論,以戲論戲,呢套同【盜賊門】相比仲爭好遠
【盜賊門】上年忙我冇出文讚,但我mark低既評價都有$60,呢套我俾佢$43啦
看穿以上話題元素,套戲整體來說一樣犯左韓國片根深柢固既壞習慣
節奏太慢,劇情太拖,結局催淚冚包散既韓國定律
其實故事可塑性好高,三個角色非常鮮明,理應可以撞出好多火花,扭出不同情節
偏偏故事婆婆媽媽,描述主角既篇幅失衡,兩角太遲出場,角色塑造太淺太急
大橋一條線去冇甚轉折,三角對北韓既心理變化亦交代乏力,後段推進失控
本身套戲打鬥場口其實唔多,但每場肉搏卻意料之外地拍出動作片既專業水準
軍事格鬥術、關節技、跆拳道招式你來我往互有攻守,動作俐落,節奏明快,緊張刺激

看著別人的成功方程式:話題作+當紅小生+粒粒星
撫心自問,都係人人皆知既市場定律,點解我地港產片又做唔到?
不如香港觀眾自己反省一下,紅來紅去都係梁潮偉劉德華古天樂吳彥祖金城武
仲有最近爆紅既Cool魔張智霖BB,仆你個X呢個物就係問題所在囉!?
40歲都過啦,仲B乜能野呢!?師奶們唔該睇下李玹雨呢隻先叫得起BB囉!
演員青黃不接,觀眾眼光狹窄,日睇夜睇TVB師奶劇降低觀影質素,就是問題所在!

Youtube:港產不打
http://www.youtube.com/cheungsecond
Facebook:港產
http://www.facebook.com/cheungsecond
Weibo:港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打,淨係唔打港產
************************
Youtube:港產不打 www.youtube.com/cheungsecond
Facebook:港產 www.facebook.com/cheungsecond
weibo.com/cheungsecond