戲曲欣賞

本帖最後由 212770 於 2-5-2011 10:28 編輯
108# 212770  
視頻睇唔到嘢,請想想辦法。
唐伯虎 發表於 2-5-2011 06:22

我都乜野睇唔到!
只是欣賞其逸靜音樂十多次。
                                       
本帖最後由 狼皮羊 於 11-6-2011 18:15 編輯

宋江怒殺閻婆惜 - 新馬師曾 鄭幗寶

                                       


http://www.youtube.com/watch?v=GrWS9dVkoDs
閻婆惜:【天上人間】情絲紛紛,情絲紛紛;儂心真掹掙。等我搽多啲脂粉,搽多啲脂粉,插朵紅花添風韻。我寂寞芳心,化作出牆杏。等待情郎來踐約訴心悃。我日夜宛似監躉,更怨夫郎薄幸。獨眠實不慣之奴奴都尚幸有人。【滾花】何故紅日沉西,尚不見三郎來到慰問。
張三郎:嘻嘻嘻【板眼】嗱我做人叻到“吻”,最怕就畀人跟。偷偷去烏龍院內,安慰嗰個意中人。佢就彩鳳隨鴉,我就行正桃花大運囉。鬼叫阿師傅,佢唔識歎,我就兜督將軍。我不過弟子服其勞,呢啲乃係古人都有訓。我唔想陳倉暗渡,只為師傅佢無能呀……能。【白】殊,殊,殊。
閻:殊,殊,殊,殊乜鬼啫?
張:阿師傅佢有冇返嚟呀?
閻:冇躝返嚟呀!
張:冇返來就好囉。阿師母……
閻:又叫師母囉?我唔鬼睬你架!你叫開我乜嘢呀?
張:係,係,係,我叫開你“心肝”嘛!阿心肝呀心肝,
閻:唔……
張:你個三郎嚟咗啦!
閻:係呀?你捨得躝嚟嘞咩?【西皮】我自覺愁莫禁,倚門望盼我情人,怨郎負了枕和衾,儂被了相思困。
張:我蒙姐恩情似海深。
閻:【插白】咪啦!
張:小張三,風流伴繡衾,
閻:【插白】做乜啫!
張:有緣相親。
閻:【插白】哎吔咁鬼肉酸!咪啦!
張:偷安慰玉人,我情堅似金。
閻:【接唱】哎吔我怕宋江起妒心,佢兇狂又勇敢嘅。
張:【插白】使乜驚啫。
閻:為求相親,你快將計謀運,
張:【插白】諗計呀?
閻:殺之也無憾。
張:【接唱】我心裏,驚震!唯望靠“坤”。好啦,我實行把計運。
閻:噉你趕快實行,效鳥同林。
張:【白】得喇,你放心啦!【長句滾花】我會扭六壬,而且個心夠狠,老虎發威唔係人噉品。我係鄆城嘅地膽,惡過好多人。打交就周時冇手震,不過念在師徒嘅份上,嘻嘻,我凡事都讓師傅佢三分。〔句〕如果佢將你難為,我就一腳一拳,我重要將佢蝦餃掹。
閻:為著我哋兩人嘅幸福,對佢都必要辣手狠心。我忙把秋波送,哎吔一笑便投懷,你來,來,來……
張:你叫我做乜鬼?
閻:共入羅帷,親近呀……
  *   *   *   *   *   *   *   *   
宋江:列位大人,請了!【京曲四平調】大老爺,打罷了退堂鼓,衙前來了我宋公明。邁步兒,來到烏龍院。
街坊甲:【白欖】真火滾,真火滾!可恨個張三郎,成日咁勾脂粉。顛倒就亂倫常,膽敢同個師母有“竟轟”。怪不得話前面有個張三郎,後面宋江追到緊。若果畀佢知呀,斬死佢都有份!斬死佢都有份!
街坊乙:開講話老人娶少妾,多數都係噉。難為宋公明,成日做老襯。我哋無謂就理咁多,不若去買酒飲,買酒飲。去囉!
宋:哎吔!方才這兩人言道:前面走的是張三郎,後面趕的是我宋公明。莫非這個賤人幹了不端,之事?且住,常言有道,事非終須有,不聽自然無也。【京曲四平調】叫聲大姐,快開門。【白】開門來!開門來!〔高聲〕開門來!
張:弊,弊,弊!師傅返嚟添,嚸算?死囉死囉!
閻:睇你個衰樣,使乜咁慌啫!頭先就揚威耀武。好心你喇睇下你個樣喇!慌到手騰腳震,哎呀快啲匿埋床底下先喇,衰人!
張:匿埋床下底呀?
宋:大姐,開門!
閻:嚟緊嘞!
宋:唓,乜咁耐架?
閻:趕住去投胎咩!噉人哋要著翻件衫至得嘅嘛!拍到地都震埋,撞鬼你咩!開嘞,開嘞!哼!
宋:大姐。
閻:姐,姐,姐!我以為邊個添,原來你個死老嘢躝返嚟。笑,笑,笑乜嘢呀你!嘻嘻嘻,鬼同你笑呀!重唔躝入去!
宋:嗄?大姐,乜嚸解我往日回來,你歡天喜地;何以今日大爺歸來,你乜事幹嬲成噉?
閻:乜我好嬲咩?
宋:你睇好似食咗火藥噉。
閻:唔係呀,我冇嬲到呀。
宋:擒渠谷氣噉。
閻:哦,或者個面口木啲唔定架喇。開講有話嘞嘛,人各有志樹各有心呀!
宋:係乜呀?噉阿大姐你有乜嘢心事唔舒服呀又?
閻:心事?冇呀!
宋:冇?有啩?我猜下你好嘛?
閻:好呀!
宋:你若無心裏事,何必怒生嗔。【京曲四平調】宋公明,打坐在,烏龍院。猜一猜大姐你,腹內情。莫不是,茶飯不合心?【白】係嘛?
閻:你估錯啦大爺!
宋:嚸估錯呢?
閻:嗱,自從你買我返嚟之後,朝魚晚肉,又嚸會話唔滿意呀!之噉噃,如果個心唔安樂呀,就算食龍肝鳳膽都冇味架宋大爺!
宋:噉呀。噉然則唔係呢樣嘢啦?
閻:梗係唔係啦!
宋:呀,呀,【京曲四平調】莫不是衣衫,不對你的身?
閻:哈哈哈哈,哎呀,好心你囉!你又估錯啦大爺。
宋:又唔啱?
閻:嗱,我穿不盡綾羅錦繡,又嚸會話唔喜歡至得架。好多謝你添。我好多謝大爺你時時做咁多衫畀過我著。之可惜得物無所用噃!
宋:嚸解呢又?
閻:我好似坐監咁坐,我著畀邊一個睇呀!你話喇?我著畀你個老鬼睇係唔係呀?衰嘢!
宋:噉又唔係啲衣著唔啱你身唔係?
閻:梗係唔啱喇!
宋;唔係呢件事?
閻:梗係唔係喇!
宋:呀,呀,
閻:呀!呀!
宋:【京曲四平調】莫不是,馬二娘,打罵了你?
閻:哼,真係笑話。我阿媽當我如珠如寶噉對我嘅,又嚸捨得打我呀?又嚸捨得鬧我呀?
宋:咁又唔係?
閻:唔係囉!
宋:又估錯?
閻:估錯囉!
宋:這不是,那又不是。呀!呀!
閻:哼!
宋:【京曲四平調】莫不是大姐你,把我嫌憎?
閻:哈哈哈,啱曬囉!咳,你猜咁耐而家至猜中我。對嘞,冇錯嘞,你講得好啱嘞!
宋:啱嘞咩?
閻:人生世上,除咗衣食住之外,要有精神寄託至得架嘛,呢如果精神冇痛苦就好喇,否則精神有痛苦呀,哼!就算住瓊樓,衣錦繡,食嘅係龍肝鳳膽,都不過如是架咋宋大爺!
宋:都唔使咁惡架大姐!
閻:【木魚】你都算聰明到絕頂,
宋:【插白】過獎。
閻:重利害過諸葛先生。嗱,而家你既然係猜中囉,又怕乜對你直陳。
宋:【插白】好啦,講啦。
閻:自從你買我歸來,就註定我終身抱恨呀!我嘅前程幸福,就喪在你啲萬惡嘅黃金。你剝奪我嘅自由,重慘過做監躉。
宋:【插白】係你至好講噃。
閻:你視我為玩品之嘛!【二黃下句】開講話施恩勿望報,何況你已是有婦,嘅使君。【唱序】你年紀又不相登。都可謂誤己更誤人,顯見你係施恩,存非份。
宋:【白】啊!原來係噉樣!哈,哈,哈,真係好一個牙尖嘴利嘅閻大姐!
閻:過獎啫,有乜嘢指教呢宋大爺!
宋:我嚸敢教呀,閻惜嬌!
閻:哎吔宋公明!
宋:閻婆惜!
閻:宋江!
宋:我把你個賤人!
閻:哎吔我把你個老烏龜!
宋:估不到我用了不少金錢,只博得就係烏龜王八!咳,宋公明,你真是好人難做了!【慢板下句】罵一聲個閻惜嬌,你是個無恥,賤人。想當年,你為歌女,你淪落他鄉,你嚴親,遭病困。可憐他,死難成殮,你要葬父,賣身。【古老中板】你跪在長街,你無人問,清晨買到,近黃昏。俺宋江我就上前,將你問,我贈銀百兩,你葬嚴親。可憐你母女兩人,無倚憑,我烏龍院內,我養釵裙。【滾花】誰料你負義忘恩,你反將某怨恨。
閻:哎吔使乜生蝦咁跳啫?【恣油白欖】我尊聲阿宋大爺,又何必要咁掹掙!須知買賣嘅愛情呀,多數都係噉架嘞。你自作多情假施恩,又鬼叫你甘心願做老襯咩。我與你名份都竟全無,又難怪我對你係無情感架嘞。之不過我話曬都受過你恩,否則我趕你都有份!衰嘢!
宋:【白欖】哎呀,人道就青竹蛇如口,黃蜂尾後針,兩般猶未毒,最毒呢啲婦人心。〔一锤〕我不敢就怨他人,只怨我自己就太過笨。我睇你就一定有新歡,
閻:【插白】係又嚸?
宋:唔係你唔會恃成噉。居然攪到就趕我扯,喂!我問聲你就烏龍院內邊個係主人呀又?
閻:哈哈,噉就真係笑話嘞!【長句滾花下句】呢你咪沙塵,我勸你咪沙塵,你無權干涉我權衡。我縱有新歡你亦難過問,雖則是烏龍院內你係主人。
宋:【插白】知咪好囉。
閻:之但係此屋今時都冇你份,你又記否當年嗰張屋契,分明寫住我係呢一間屋嘅主人。
宋:【插白】唉吔弊,簽咗個名添!
閻:你被聰明誤,呢那,皆因為你怕老婆,請你立即離開,免阻我與愛人嚟煙韌呀。扯!扯!
宋:【滾花下句】你吞佔樓房都猶可恕,何堪語語,你都作迫人!我罷,罷,罷,我拂袖而行,從此後我都不聞不問。
閻:咪住,咪行住!做乜嘢呀你!哦,乜你就噉就算架嘞?
宋:到呢個噉嘅時候,撞啱你呢隻噉嘅嘢,唔算都要算啦!
閻:真係好笑嘞又。【三腳凳】你口講都無憑據,須知口講又實無憑。
宋:丈夫就一諾千金,試問如何方信任?
閻:呢除非你肯誓願。
宋:【白】呸!真係笑話啦你,我宋江一不為非,二不作歹,咳,你唔好迫人咄咄噃。要我誓願,【唱】誓願我萬萬不能。
閻:【白】我識穿你壟嘢嘞宋江!
宋:識穿我乜呀?
閻:【滾花】你梗係捨不得華廈與佳人,所以我要你誓願你都唔敢。
宋:我呸!【快點下句】連忙跪在地埃塵,倘若是公明將你恨,黃沙蓋面身首相分。【滾花】我拂袖而行,我就高飛遠引。
閻:喂,乜咁快就扯嘞,好行夾唔送囉噃!
宋:我呸!
閻:得閒嚟坐啦!我重唔裝到你個宋江!激一激你咋,你個衰嘢就扯唔徹嘞。連屋你都唔愛啦,好,一安二樂!我不單只搵元寶蠟燭送你個衰神扯呀,我重要搵碌柚葉淨過曬間屋先至得架真係。……哎呀三郎呢?三郎,三郎呀!啋!撞鬼你咩!乜你度度都唔匿,匿正係個屎桶側邊啫?做乜呀你?好驚呀你?
張:唔驚,唔驚。使乜驚啫!使乜驚啫!不過免吵啫。喂,殊……走咗啦?
閻:走咗嘞!
張:走咗就好囉!
閻:咦!個衰公漏咗個公文袋喺度添。等我睇下裏面有乜嘢先咋。哦,原來有二兩黃金,一封書信噃。好,等我拆開封信睇下講乜嘢至得。哈哈哈哈!
張:唓,做乜嘢?乜嘢信呀?嚸解你一路睇一路笑噉嘅?究竟因何底蘊呀?
閻:三郎,你知唔知啫?原來個死老坑呀,佢不知生死噃,居然咁大膽,私通梁山嗰班賊人噃!
張:嗄?真嘅?
閻:你拎封信去睇真下啦!
張:畀我睇過。【滾花下句】好嘞,好嘞,呢回畀我摣住佢嗰只痛腳,可以同你日夜講心。佢嘅通賊信,在我掌中,怕乜嘢打開嗰度房門,同你公開煙韌呀。【白】打開門。
宋:唉吔!響邊處?【滾花下句】我憶密函,曾失落,我都不覺暗裏驚心。待我重返烏龍院中,待我細細跟查,驚怕事發東窗,就會罹劫運。
閻:【白】咦,哎吔你又話唔返嚟嘅!嚸解衣家你又返嚟呀?
宋:乜我返嚟你好驚咩?
閻:驚乜嘢驚!我睇死你架啦宋江,我老早話你梗係唔捨得我架啦!居然返嚟嘞咩?
宋:我嚟話畀你聽,我之所以返嚟,我唔係因你,我因為漏咗多少東西,呢件事幹係非常要緊嘅!
閻:我知,你遺下咗個公文袋之嘛,又使乜咁緊張啫?
宋:乜唔緊張呀!
閻:裏面重有黃金二兩。
宋:乜你睇過添呀?
閻:係定啦!重有一封書文添噃!
宋:弊啦!阿大姐你睇過就好啦。噉,阿大姐,裏面嗰二兩黃金我唔要嘞,只求你畀翻封書過我,嗰二兩黃金,我就算畀過大姐你買脂粉好嘛?
閻:哼,哼,乜你想愛翻封信咩?
宋:係囉。
閻:有條件個噃!
張:冇錯嘞,實行要講妥數口至好交畀佢呀!千祈唔好受佢“坤”。
宋:【滾花下句】我罵一句張三小輩,你都莫謂眼底無人。你嘅虧心事,你重敗倫常,哎吔!你又想試爺爺呢一把利刃呀!
閻:撞鬼你乜!做乜嘢啫!
宋:哼!畀唔畀嗰封書嚟?我話畀你聽呀,你精精地將封書畀翻過我,唔係我殺咗你都有份架!
閻:得呀!我有條件嘅,我要你寫休書,解除咗同居嘅關係,我方能交換書文。
宋:哎吔!乜你要我寫休書,混你個帳!想我宋江一生人,一不休妻,我二不棄妾,你迫我嚟寫休書,我都勢難答允。
閻:好啦使乜咁緊張啫?唔答允唔係罷囉,哎吔,算啦!請呀!
宋:你去邊處你?
閻:我去休息瞓覺囉!
宋:瞓覺?噉你唔理我囉噃係嘛?
閻:你唔肯寫唔係算囉,無謂啦!
宋:喂,大姐,縱使間我寫畀你,都唔得架。你睇堂前都無筆墨。
閻:哦,你想搵筆墨之嘛,已經準備好嘞。
宋:哎吔,乜你真係有架!哦,原來你個衰嘢都早有此心。
閻:你估!【連環扣】你大我廿歲不相登,以偽善去欺人,我真真怒憤,就算我還恩同居求護蔭,你為乜嘢要誤人!
宋:你令我怒氣火燒心,悔我誤做了好人,不該將你護蔭。施恩贏得你嘅良心全盡泯,你把丈夫當仇人!
閻:我啋!黃金存心佔得佳人,我與你同居都無名份,幸福又靠誰人?
宋:我望求尚記一點恩,
閻:我實行要另嫁三郎,快相分!
宋:唉吔!【反線中板】我切齒恨,你呢個淫娃!今日一旦恩將仇報,竟改嫁文遠,嗰個小畜牲。你顛倒亂倫常,我嘅面目歎無光,今日枉種善因,今日徒得恨。你迫我寫,休書,哀莫大於心死,可歎你一意,你就孤行。今日我更恨,你個賤人,你呢種潑辣嘅心腸,你真正狼兇,太毒狠!我本把你一刀呀,身首相分,可奈我昂藏七尺,不忍做出煮鶴焚琴。【直轉滾花】我含怒火,我迫作寫休書。
閻:【白】係寫你就快啲寫啦!你做乜嘢啫?
宋:使乜咁快,你而家趕住去死呀你!【唱】我為換呢封密函,都要共你斬斷名和份。【白】嗱!
閻:睇過。重差一樣噃,嗱,你都未曾打手指模呀,唔該你打埋手指模先啦!
宋:哎吔,你呢只衰嘢認真叻,連打手指模你都曉。
閻:快啲嘞,我唔同你講咁多,快啲打埋佢啦!
宋:唔使啦啩?
閻:乜唔使呀!快啲嘞!
宋:嗱!打埋畀你嘞!嗱!立即交翻封書函。話畀你聽,呢笪地方我唔想喺處多留一陣呀!
閻:哎吔,真係對唔住囉宋大爺,嗱,而家我書函又攞咗啦,休書又得咗啦。你想取回封書信,我唔該你去衙中見大人啦!
宋:【先鋒鈸白欖】罵賤人,罵賤人,你就心太狠!你不交信,你就要亡身,要亡身!
閻:【白欖】罵句宋公明,你膽子都大得很,竟將儂嚟欺騙,你想死定想生!你想死定想生!
宋:【快點下句】嬌花無信太欺人,我怒舉鋼刀,【滾花】我將你來手刃。
閻:喂!你做乜呀!哎呀!哎呀!哎呀!
宋:重唔死!重唔死!哈哈!哈哈!呵哈哈哈!【滾花下句】我且到公堂來自首,正係丈夫做事,我決不禍及他人。
1

評分次數

呢首歌裏面有一句客家話。
〔中共不等同中國,正如和尚不等同寺廟〕
〔不滿中共極權統治的華人,可以有兩個選擇: 一是看待中共等同中國,去應付十三億敵人;二是看待中共不等同中國,祇要應付七千萬共產黨員就夠了〕
唱做詞曲哀艷纏綿,任白那有不成佳話。

幽媾

                                       
艾毒德輸小,李市下握哦丫!
幽媾

男唱: 好似月裡仙降凡塵, 輕弄降紗, 輕弄降紗. 莫非冷煙閉月華.她雨中竟致迷途, 迷途錯歸家.
男白: 係唔係呀...
女白: 唔係...
女唱: 我寄遇..寄遇在柳蔭下, 悲風霜乞片瓦.
男唱: 我非關有意..有意苦追查, 夜半芳齋欠奉茶, 妳莫借西廂送藥茶, 我借盞秋燈妳小心歸去吧....
女唱: 嘆息我命如霧裡花, 杜麗娘未有家泣孤寡.
女白: 我無家可歸架..
男白: 世間女子, 那有無家之理架..?
女白: 真既呢..   男白: 啊..我知喇
男唱: 莫非天仙姐姐妳愛我瀟灑, 所以偷偷降落在..柳生衙
可惜我 ... 一介 ........ 潦倒 ... 潦倒既寒儒, 怕有偏差.
女白: 你錯喇.
女唱: 既屬有夢註佳話, 當管不了月夜... 月夜月夜叩奔君家...
我慕君風華, 我愛君風華, 盼君泣月下... 屈居柳蔭受霧雨打, 盼蝶來話了解語花.
男白: 啊..小姐, 點解你忽然, 又會淚隨聲下架呢..?
男唱: 佢泣訴多風雅, 悲逝水韶華.. 欲仿傚情花... 再萌芽..
男白: 嗯..小姐, 妳是否文君新寡架..?
女唱: 我貞花未嫁..架
男白: 哦..妳未嫁架..
女唱: 我獨處深閏未嫁...
男唱: 既是天仙天仙未嫁, 咁就亦緣也, 福份也..
想落又心中驚怕, 想下又心中驚怕, 點解會相見相見在蕉樹下..
女唱: 君心休怕, 君心休怕, 君不記你泣拜仙觀下.
風吹飛花有心...報與君在佛前為你灑, 致令郎拾去我丹青畫.
女唱: 咁真與假..?
男唱: 確未有差.
女唱: 衹係腰瘦減.
男唱: 一般貌似花. 丹青仙姿兩瀟灑.
女唱: 比冷煙冷煙蓋玉顏銷毀了鉛華..驟降丹青價.
男唱: 咁鴛鴦帳內同夢去.
女唱: 我又怕冰肌凍著了郎又怕.
男唱: 我唔怕唔怕..
女唱: 我又怕又怕...聽二更斷續了兩三下..
男唱: 盼月照香衾且閉窗莫理它.
118# 212770

住在多倫多的Gladys Chan,她一人同時用子喉平喉唱<幽媾>,師姐有冇聽過?
較為可惜是用Karaoke background music,如果是live band就完美了。
                                       
118# 212770

住在多倫多的Gladys Chan,她一人同時用子喉平喉唱,師姐有冇聽過?
較為可惜是用Karaoke background music,如果是live band就完美了。
pckOx9FTnSw
tc1990 發表於 13-6-2011 03:10
t c 兄,你咁醒,呢D都比你揾倒.好嘢.