C1色生活外傳小說(更新3)#11

肥仔認為新一年,應該有d新意既…

我唔反對,只不過佢講既新意,其實一d新意都冇,講落都係舊聞,重要係比friends勁寸既舊聞…

“你好似幾個月前講話幾個月ok架喇喎,而家呢?都好多個月喇喎!”健三即時反應。

“佢減肥?得啦!我聽左十九幾年啦!”永冇鼓勵既阿榮永冇好野講。

“你好野,我就lock你地棚牙”肥仔個口冇郁,心諗唧。

對上一次肥仔成功減肥,亦係因為阿榮既寸寸貢!只不過成功完成後壓力越大,反彈力越大。隨住佢同舊愛“精lee lee”既同居生活結束,佢唔單止贏左一段戀愛既學習過程,重贏左幾十磅。

“唔係好肥唧…嘻嘻”肥仔果時成日都開口埋口。

終於,肥到自己頂唔順收場,變成百九幾磅!

爆肥呢家野其實係人都試過,林公都一樣,重要同“為愛情受傷柏拉圖式”暴肥!簡單d講,即係比條女嘈肥,又或者自以為已經有人認頭、有著落地自我心廣體胖症!

根據一項非正式、但相當準確既調查顯示,香港適婚但係唔識分事非黑白既男子,大部份都曾經喺溝左女之後暴肥最少半個碼或以上!症狀當中,重包括“併發性戀愛盲目”、“勸告聽唔入耳性失聰”等等…調查顯示,大部份男性喺呢段戀愛失敗甩拖之後,通常體重都唔會因為失戀而消瘦番;反而會因為玩借酒消愁,愁完再食消夜,食完消夜再食埋早餐至訓,而攪到惡性循環,肥完再肥…

呢個“病”最惡毒既地方,並唔係肥咁簡單。而家伴隨帶黎既後遺症,包括:“肥到搵唔食症”、“失去溝女信心症後群”等等,成為所有男人既頭號殺手!

“關咩事丫,肥你就肥啦!姓賴既咩!我果時即刻操番,重有6舊添啦!”林公好自豪咁講,爭d忍唔住想拉起件底衫展示一下而家已經變番一舊既“腹肌”。

“挑,多餘,又唔見我會咁!”阿榮最可惡既地方,就係專拗!

於是,肥仔落左個好嚴重既決定…

“我一定要喺你同娜姐結婚之前,變番fit”肥仔講時雙眼有火!

“你係咪唔識寸字呀?Fat係讀fat唔係fit喎!哈哈…”連自身難保既健三都加入埋一份。

之後換黎3條友肆意既笑聲!

“好,我就要你地後悔!”

三條友既笑聲,更大!

“如果我喺期限之前減唔到,我就呢世都溝唔到女!”有理由相信,肥仔今晚可能真係飲大左。

“小,你係咪都溝唔到女架啦,哈哈…”林公永世死剩把口!

“放心啦,女既野,我會幫你溝哂架喇,你放心去啦!”健三得戚附和,三條友笑得更大聲。

為左面子、為左尊嚴,肥仔終於被迫踢上左不歸路…