Mitsubishi Outlander 2.0

Mitsubishi Outlander 2.0

本帖最後由 ahmou 於 10-6-2010 09:35 編輯

環保大使 Outlander  4變 2慳 6萬


以前一講 SUV,城市越野喎?梗係有型行先,四驅係咪嘥油,我真係懶理,不過今時今日,就算唔旨在啲錢,食油怪始終會俾人批評係環保剋星。要有型同兼顧環保,點會唔得?好似三菱 Outlander2.0,就係一架打正環保旗號的七人 SUV,將四驅換上兩驅,幫荷包慳番唔少之餘,都係時候為環保出一份力喇!

記者:趙慧敏
攝影:林栢鈞
Model: Pinky@Pure Models


■設有頂架,唔擺雜物都上型味。


■側鏡設有指揮燈。


■ 18吋合金胎軨,襯得起大車身。

4WD雙生花

■駕駛座舒服到可以瞓一覺。

去年鮮有新車推出的三菱,蟄伏一年後,踏入 2010年,開始發動一連串攻勢,最令人關注的當然是 i-MiEV電動車正式在市場公開發售,似要用行動證明電動車發展,已踏入成熟期,雖然反應如何暫時仍是未知之數,不過話口未完,三菱再有一款以環保招徠的車款推出市場,而且還是市場少有的七人 SUV。其實 Outlander早年曾先後推出 3.0及 2.4款式,今次廠方將引擎降至 2公升,又將原來的 4WD改為 2WD,明顯衝着減低耗油的環保市場而來。外觀上,兩驅 Outlander跟本來的四驅版本可以視為孖生兄弟,同樣擁有三菱鯊魚式車頭設計,凌厲的頭燈,配在 SUV身上,實在襯得起有餘。不過今次重點唔係外觀,而係性能跟 2.4版本的差距。老實講,睇番數據,將原來 2.4公升引擎改為 2公升引擎,令馬力由 170匹下降至 148匹,不過峯值扭力亦由原來 4,100轉釋出 226Nm,下降至 4,200轉才釋出 197Nm,動力稍降是意料中事,不過數據歸數據,而且 4WD與 2WD,始終是兩碼子事,真正駕駛感覺才夠實際。


■ LED尾燈組合,夜晚搶盡鏡頭。


■起角的頭燈設計,十分凌厲。


■中控台設計與 2.4版本相同。


■中排座椅伸展位足夠。

咬地感稍削

■尾座設計偏窄,但翻下地台收藏後,帶來十足空間。

踏入車廂,已定下目的地是彎多路斜的清水灣,雖然深踏油門後,引擎聲稍稍欠缺雄渾感,但一口氣直衝上大斜路,仍有足夠力水,選用+/-波撥片,轉波反應利落。不過始終是 2WD,加上高車身,在彎路時咬地表現稍為遜色。講到其他設備, 2公升版本同 2.4版本確是不相伯仲,大天窗當然是 SUV必備, 18吋合金胎軨、霧燈、 LED尾燈組合,都啱晒車主要求。至於內櫳佈局,雖然第二排空間十足,但尾排則稍嫌夾硬嚟,為遷就座椅可完全置於地台下,座椅軟墊明顯較薄及狹窄,但可以多載兩個人,始終較合乎經濟原則。環保分子數口精自然是理所當然,既然 Outlander2.0被政府確認為環保私家車類別,可獲 30%首次登記稅優惠,車價只係$239,900,比起 Outlander2.4要$299,900,足足平成 6萬,計埋慳番嘅電油費,確係諗得過。


■車形剛陽味十足,估唔到都做到環保一族。



Outlander2.0規格
引擎: 1,998cc MIVEC
馬力: 148ps/6,000rpm
扭力: 197Nm/4,200rpm
傳動: 6前速自動變速系統
售價:$239,900
查詢: 2721 1111(寰宇汽車)
附件: 您所在的用戶組無法下載或查看附件
ahmou<0_0>uomha
本帖最後由 bigpotato 於 10-6-2010 10:12 編輯

師兄,呢部大口仔先係今年款喎、、、 上面嗰部除咗鬼面罩些少分別同邊鏡有燈外,成部07-08年款
大蕃薯
只是轉載, 有時我都唔知得太清楚
ahmou<0_0>uomha
小喇叭,爛果報班友點做野架?新款出咗幾個月都唔知,唔夠專業喎、
大蕃薯
本帖最後由 ahmou 於 25-5-2012 08:45 編輯

私駕路:大大部 SUV 的骰女任舞
2012年05月25日

                                       

「我鍾意佢高大、穩重、有承擔,之但係我咁細粒揸唔揸得掂㗎?」唔好以為 SUV仍是男人專利,新一代 SUV唔只更易操控,耗油量都係比私家車多少少,三菱 Outlander就是其一。長測幾日更吸引到唔少女士垂青,我係指部車呀!

記者:李鑒泉
攝影:陳盛臣
Model: Rain Wong@PureModels

揸落比實際細部

從01年以 Airtrek名義推出至今, Outlander一直活在老大哥 Pajero的樹蔭下,馬力既不是最大,又不是採用陣式四驅,對死硬派粉絲看來欠缺吸引力。但事實上又有多少人真的會將座駕駛到蠻荒森林去?又能接受硬橋硬馬車架帶來的突兀震動? Outlander正是廠方針對城市人鍾情 SUV外形及舒適駕駛感受之間的答案,唔信?以上代 Outlander為例,前驅版銷量比四驅版足足多幾倍,加上日滙影響,四驅版車價突破30萬元心理關口,代理索性只引入兩公升前驅版,取得環保私家車資格後,車價27萬元有找,平近5萬元,平嗎?唔算,但入門級 SUV大多要這個價錢,感覺變相平咗。

傳統 SUV車身大、睇位難的情況不適用於 Outlander身上,雖然車身尺寸達4,640×1,800×1,720mm,但因座位唔高,乘坐感與房車 Lancer無太大分別,數日來在下白泥或鬧市中左穿右插毫無難度,揸落感覺比實際細部。測試幾日,無論姨媽姑姐還是一班八卦女同事均得出同樣結論,泊車也是大車的難題,尤其是下大雨的晚上要停泊幾乎車貼車的九龍城錶位更是一大挑戰,幸有後泊鏡頭及雷達幫助,一手軚泊 S位真係話咁易。


■車尾設計平實,而且有原裝後備輪軚。




■在市郊行走又怎少得天窗。



造型內斂 輸出斯文

儘管是前驅,但兩公升 MIVEC直四輸出的148匹馬力足以推動1,520公斤重的車身,在公路巡航時轉數維持在1,500轉左右,受六前速 CVT自動波箱影響,重點落在慳油多於性能表現,轉用軚盤的+/-波撥片後加速反應略有改善,亦減低因轉數不足而不斷轉波的尷尬情況。錶板中顯示屏除顯示油耗及續航距離外,更會因應油門及制動力度而顯示 ECO標誌,玩足幾日,油耗約$1.6-$1.7/km,畢竟咁大部車,差不多啦。

Outlander唔只輸出斯文,就連造型都比 Man到爆的 Pajero「和諧」得多,此和諧不是指骨線盡露的引擎蓋、外拋輪拱、電鍍金屬泥擋、黑色頂架及18吋輪圈唔夠惡形惡相,只是相對內斂,女性揸也絕對唔會被認為揸錯車。但最令女性歡喜的卻是上下開啟的尾門,上層可獨立打開,甚至平台底部也有200公升空間,夠方便,唔夠擺的話更可將第二及三排座椅收起,全車搖身一變成為小貨車,運足成車衫都得。如果硬要說第三排坐得舒適就肯定是騙你,但兩個座位在一大班姊妹 High Tea後作短途運輸亦不失為一個好辦法,同埋以精打細算的角度,同價錢當然以七人 SUV最抵買!


■中控台、軚盤等造型以實用為主。


■後排座位用料較薄,只合短途車使用。


■錶板會顯示油耗及續航距離,測試後發現每公里大約$1.6。


■後波雷達是下雨泊車的好幫手。


■倒後鏡能顯示車尾後泊鏡頭的畫面。


■翻平中後座後,車廂空間激增不少。

Mitsubishi Outlander2.0L MIVEC

引擎:1,998cc直四
馬力:148PS/6,000rpm
扭力:20.1Kg-m/4,200 rpm
傳動:六前速自動波 CVT,前輪驅動
售價:$266,800(已扣環保稅)
查詢:27211111(環宇汽車)
附件: 您所在的用戶組無法下載或查看附件
ahmou<0_0>uomha